من اكتر المشاكل المزعجة اللي بتضايق كتير مننا هي مشكلة اسمرار حول الفم في كتير يعانوا منها وبتبقي مسببة لنا ازمة لان بيكون شكلها مش حلو وبتشوه شكل الوش خصوصا انها في منطقة مهمة وملفتة, اليوم نقولكم على أسباب اسمرار في منطقة حوالي الفم لان معرفة الأسباب هي اول خطوة في علاج المشكلة, وجيبنا لكل بنات حوا الحلوين وصفات طبيعية للتخلص نهائيا من السمار حوالي الفم.
الأسباب و تفتيح الشفايف
1- ممكن يكون سبب السمار ده التهاب المنطقة دي وفي الحالة دي لازم نعالج الالتهاب الأول عند دكتور متخصص, وبعدين نستخدم الوصفات الطبيعية عشان نعالج السمار اللي ناتج عن الالتهاب.
2- من أسباب السمار كمان هو قلة ترطيب المنطقة دي وده بخيليها تنشف وبتسبب السمار, لان منطقة حوالي الفم تتعرض للمية كتير طول اليوم يعني بعد ما بناكل او نشرب حاجة طول اليوم بغسل بعدها المنطقة دي وده بخليها تنشف عن باقي البشرة عشان كده لازم نرطبها بعد كل مره نعرضها للمية بكريم مرطب.
3- ممكن تكون بسبب مرض جلدي زي الاكزيما وفي الحالة دي محتاجة دكتور جلدية عشان تعالجي المشكلة الأول قبل أي حاجة.
4- من أسبابها كمان التعرض للشمس لفترات طويلة, عشان كده لازم قبل ما نخرج من البيت نحط واقي من الشمس عشان نحمي بشرتنا من الاسمرار وبقع الشمس.
5- وممكن يكون السبب داخلي يعني تكون بسبب نقص فيتامينات في الجسم لان كلنا عارفين ان المشكلة وعلاجها كمان بيدا من جوه قبل بره عشان كده لازم تتأكدي ان جسمك بياخد كل الفيتامينات المهمة اللي لزماه, وكتري من اكل الفاكهة والخضروات الطازجة.
6- معظمنا عندنا عادة بنحط ايدنا حوالي منطقة الفم او على وشنا وده غلط لان ده بتنقل البكتيريا للمنطقة دي وبالتالي بخليها تسمر.
7- استخدام مكياج رخيص او مش معروف مصدره من الحاجات المضرة جدا ببشرتنا ومن أسباب السمار حوالي الفم عشان كده لازم نستخدم ماركات كويس ومعروفة عشان نحافظ على بشرتنا.
8- معجون الاسنان من الحاجات اللي ممكن تسبب أسباب حوالي الفم لان فيه مادة الفلورايد اللي بتسبب غمقان منطقة حوالي الفم عشان كده بعد ما نغسل سنانا نغسل حوالي الفم كويس من اثار المعجون, وكمان الصابون لما نغسل المنطقة دي بعد الاكل نغسلها كويس من اثار الصابون.
9- تراكم الجلد الميت على البشرة ممكن يسبب اسمرار المنطقة دي عشان كده لازم نهتم بتقشير بشرتنا مره في الأسبوع عشان نتخلص من الجلد الميت, ونشرب كمية كافية من المية خلال اليوم.
10- بعض أنواع الفاكهة زي البرتقان واليوسفي واحنا بناكلها ممكن تنزل عصير على منطقة حوالي الفم واكل الموالح من الحاجات اللي ممكن تسبب اسمرار حوالي الفم فلازم نأخذ بالنا واحنا بناكل الحاجات دي, وكمان لو شربنا مشروبات غازية وعصائر من غير ما نغسل الفم اللي يحصل ان بقايا السوائل دي بتراكم عند منطقة حوالي الفم وبتسبب السواد فلازم تكوني حريصة بعد ما تشربي او تأكلي أي حاجة تغسلي منطقة حوالي الفم كويس وترطبيها بعد الغسيل زي ما قولنا.
بعد ما عرفنا كل الأسباب تعالوا نشوف مع بعض وصفات طبيعية بتخلصك من اسمرار حول الفم:
1- الوصفة الأولى:
اخلطي معلقة عسل نحل مع معلقة زبادي وادهني بيها منطقة حوالي الفم وسيبيها لمدة ربع ساعة وبعدها اغسليها بمية دافئة ونشفيها كويس ورطبيها بكريم مرطب.
2- الوصفة التانية:
اخلطي معلقة كبيرة نشا مع معلقة كبيرة مية ورد او مية عادية بس تكون مغلية سيبيها تبرد او تبقى بس دافئة وبعدين اخلطيها مع النشا وقلبيهم لحد ما تذوبي النشا في المية كويس ويبقى الخليط عندك قوامة معقول ادهني بيه حوالي الفم وسيبيه لمدة نص ساعة وبعدين اغسليه بمية دافئة, لو كررتي الوصفة دي يوميا وتحسي بالفرق وتلاقي المنطقة افتحت كتير واستمري عليها لحد ما تتخلصي من السمار خالص.
3- الوصفة التالتة:
اخلطي معلقة فازلين مع معلقة عصير ليمون معاها معلقة عسل نحل وقلبيهم كويس مع بعض وادهني بيهم حوالي الفم وسيبي الخليط ربع ساعة وبعدين اغسليه بمية دافئة, الخلطة دي من الخلطات الفعالة جدا في علاج اسمرار حول الفم وتلاحظين النتائج بعد فترة قصيرة من استخدامها.
4- الوصفة الرابعة:
اخلطي عصير نص ليمونة مع معلقة جلسرين وادهني بيهم حوالي الفم كل يوم قبل ما تنامي وسيبيه لحد الصبح, ولو بشرتك حساسة من الليمون ممكن تضيفي على الخلطة معلقة مية ورد.
5- الوصفة الخامسة:
جيبي قشر البرتقان ونشفيه واطحنني وخدي منه معلقة وضيفي عليه معلقة شوفان مطحون ومعلقة عصير ليمون اخلطيهم كويس مع بعض وادهني بيهم حوالي الفم وسيبيه عشر دقائق وبعدين اغسليه بمية دافئة.
6- الوصفة السادسة:
اخلطي معلقة عسل نحل مع معلقة نشا معاها معلقة لبن وضيفي عليهم كام نقطة عصير ليمون وقلبي الخليط وكويس وادهني بيه حوالي الفم وسيبيه ربع ساعة وبعدين اغسليه بمية دافئة.
7- الوصفة السابعة:
افركي منطقة حوالي الفم بشريحة بطاطس او ادهنيها بعصير البطاطس, استمري على الوصفة دي يوميا تلاحظي النتائج بعد فترة قصيرة جدا.
8- الوصفة الثامنة:
اخلطي معلقتين شوفان مطحون مع معلقتين عصير طماطم ومعلقة لبن اخلطي المكونات كويس وادهني بيهم حوالين الفم وسيبي الخليط ربع ساعة وبعدين اغسليه بمية باردة.
9- الوصفة التاسعة:
ادهني منطقة حواليي الفم يوميا بزيت اللوز الحلو وسيبيه لمدة عشر دقائق وبعدين اغسليه بمية باردة.
10- الوصفة العاشرة:
اخلطي نص معلقة نشا مع نص معلقة دقيق وشوية عصير ليمون ومية ورد “لو بشرتك حساسة ممكن تستغني عن الليمون”, اخلطي المكونات مع بعض لحد ما تكون عندك عجينة قوامها متوسط تقدري تفرديها على بشرتك بسهولة, حطي الخليط حوالي الفم وسيبيه نص ساعة لحد ما ينشف وبعدين شيليه عن طريق الفرك وبعدين هاتي قطنة وادهني المنطقة بمية الورد.
تعليقات
إرسال تعليق